Noticias en idioma armenio

Երեւանի աւագանիի ընտրութիւններուն ՀՅԴ-ի առաջին եռեակը

Eleccciones-erevanՀՅԴ Հայաստանի Գերագոյն մարմինի անդամ Վահագն Մատինեան երէկ Կեդրոնական ընտրական յանձնախումբին ներկայացուց Երեւանի աւագանիի  ընտրութիւններուն մասնակցելու ՀՅԴ-ի գրանցման դիմումը:

Մատինեան լրագրողներուն հետ զրոյցի մը ընթացքին նշեց, որ ՀՅԴ-ի ցանկը բաղկացած է 77  անդամներէ:

Ցուցակը կը գլխաւորէ Հայաստանի Հանրապետութեան բնապահպանութեան նախարարութեան անտառային կոմիտէի նախագահ Միքայէլ Մանուկեան:

Երկրորդը «Երկիր մետիա» պատկերասփիւռի կայանի տնօրէն Դաւիթ Յակոբեանը, իսկ երրորդը` Երեւան քաղաքի ՀՅԴ կոմիտէի ներկայացուցիչ Խաչատուր Ստեփանեանն է:

Մատինեան նշեց, որ իրենք բոլոր թեկնածուներն ալ կը նկատեն մրցակից:

Պատասխանելով այն հարցումին, թէ երեւանցին ՀՅԴ-ին ձայն կու տա՞յ, ան արձագանգեց. «Այո, երեւանցին Դաշնակցութեան ձայն պիտի տայ, մեր թեկնածուն մեծ յարգանք եւ սէր կը վայելէ: Մեր աւագանիի անդամները բարձր արհեստավարժութեամբ օժտուած են»:

Լրագրողները հետաքրքրուեցան, թէ ՀՅԴ-ի վարկանիշին վրայ ինչպէ՞ս պիտի անդրադառնայ Քոչարեանի դատավարական հոլովոյթներուն մասին ՀՅԴ-ի յայտնած դիրքորոշումը:

Ի պատասխան` ան ըսաւ, որ Դաշնակցութիւնը երբեք չէ խուսափած իր կարծիքը արտայայտելէ: «Ինչ որ ըսած ենք, ատիկա իրականութիւն է»,  նշեց ան:

Դիտարկումին, թէ մամուլը գրած է, որ ՀՅԴ քաղաքապետի թեկնածուն քրէական գործով մեղադրեալ եղած է, ան ըսաւ. «Գաղտնիք չէ, որ 1994-ին ՀՅԴ-ն այդ օրուան իշխանութեան կողմէ արգիլուեցաւ եւ շատ դաշնակցականներ, որոնց կարգին Միքայէլ Մանուկեանը, շինծու գործերով ձերբակալուեցան»:

Մատինեան նշեց, որ, եթէ այդ գործը շինծու չըլլար` յետոյ ան ազատ պիտի չարձակուէր:

Յիշեցնենք, որ ՀՅԴ աւագանիի ընտրութիւններու կարգախօսն է` «Միասին` յանուն Երեւանի»

Tags

Argentina
Arménia y Diáspora