Noticias en idioma armenio

Կիւրեղեան. “Առաջարկուող նախագիծը որոշ մտահոգութիւններ կը յառաջացնէ”

Armenuhi-GureghianԿառավարութեան կողմէ հրաւիրուած Ազգային ժողովի արտակարգ նիստին, որուն ընթացքին քննարկուեցաւ ընտրական բարեփոխումներուն մասին նախագիծը, ելոյթով հանդէս եկաւ Ազգային ժողովի ՀՅԴ խմբակցութեան քարտուղար Արմենուհի Կիւրեղեանը` լուսարձակի տակ առնելով կարգ մը մտահոգութիւններ:

Ստորեւ` անոր խօսքին ամբողջութիւնը.

«Այո՛, մինչեւ հիմա մեր երկրում առկայ է եղել ժողովրդի մէջ դժգոհութիւն գրեթէ բոլոր ընտրութիւնների արդիւնքների վերաբերեալ, վստահութիւնը գրանցուած արդիւնքների նկատմամբ միշտ ցածր է եղել, եւ եթէ վերլուծենք Ազգային ժողովի վերջին ընտրութիւնների արդիւնքների նկատմամբ գնահատականները, ապա կը տեսնենք, որ արձանագրուել է փաստ, ըստ որի` ընտրատեղամասերում ընտրակեղծիքներ չեն գրանցուել, եւ հիմնական դժգոհութիւնը եղել է ընտրատեղամասերից դուրս` ընտրակաշառքի բաժանման երեւոյթի դէմ:

«Եւ ես, ի հարկէ, ողջունում եմ առաջարկուող խստացումն այդ երեւոյթի` ընտրակաշառք բաժանելու եւ վերցնելու դէմ:

Ուզում եմ յիշեցնել, որ այս ամպիոնից բարեգործութեան անուան տակ ընտրակաշառք բաժանելու երեւոյթի դէմ պայքարի անհրաժեշտութեան մասին ես բարձրաձայնել եմ դեռեւս Ազգային ժողովում նոր կառավարութեան հետ առաջին հարցուպատասխանի ժամանակ` դիմելով վարչապետ Նիկոլ Փաշինեանին:

«Կարեւորն այն է, որ այս նախագծում անդրադարձ է կատարւում բարեգործութեանը` որպէս ընտրակաշառքի մեքանիզմի, այն  կիրառելը դիտարկւում է պատժելի գործողութիւն, եւ նախատեսւում են համապատասխան պատժամիջոցներ:

«Սակայն առաջարկուող նախագիծն ինձ մօտ առաջացրել է որոշ մտահոգութիւններ, որոնք բխում են նախագծում օգտագործուած` ոչ միարժէքօրէն սահմանուող եզրերով` խոստանալ, խոստում ընդունել: Եթէ եզրը միարժէքօրէն հնարաւոր չէ սահմանել, ապա ապացուցել, որ նման խախտում է տեղի ունեցել կամ տեղի չի ունեցել, որն այս դէպքում աւելի կարեւոր է, աւելի դժուար է, եթէ ոչ` անհնար:

Գիտէք` ուսողութիւնը եւ իրաւագիտութիւնը ճշգրիտ գիտութիւններ են, բայց եթէ ուսողութեան մէջ աշխատում է ապացուցման ենթադրութիւնների ու հակասութիւնների մեթոտը, այսինքն` ենթադրում ենք մի բան, քայլերի ընթացքում ստանում ենք հակասութիւն, ապա եզրայանգում ենք, որ ենթադրութիւնը սխալ էր, ապա նոյն մեթոտով իրաւագիտութեան մէջ աշխատելը, չգիտեմ, ինչքանով է ճիշդ: Չէ՞ որ ուսողութեան մէջ գործ ունենք a,b,c  վերացական մեծութիւնների հետ, իսկ իրաւագիտութեան մէջ` a,b,c յստակ մարդկանց հետ: Եւ մէկ կամ մի քանիսի յայտարարութեամբ քաղաքացուն մեղադրել կաշառք վերցնելու կամ խոստում տալու մէջ` անընդունելի է, թէկուզ յետոյ ապացուցուի, որ յայտարարութիւնը սխալ էր: Այս դէպքում գործ ունենք մարդու արժանապատուութեան եւ բարի համբաւի խաթարման, հանրութեան մէջ նրա մասին ապատեղեկատուութեան տարածման հետ: Պէտք է անպայմանօրէն վերանայել նախագծում նման` ոչ միարժէք սահմանուող եզրերի օգտագործման հարցը:

«Եւ կայ մի կարեւոր բան էլ: Կառավարութիւնն այսօր առաջարկում է  այս նախագիծը` այն նկատառումով, որ այն կը կիրառուի Երեւանի աւագանու առաջիկայ ընտրութիւնների ժամանակ: Բայց չմոռանանք, որ  ընտրութիւնները 3 հիմնական դերակատար ունեն` պետութիւն, ընտրուող եւ ընտրող: Այս նախագծով օրէնքում էական փոփոխութիւններ են առաջարկւում` յատկապէս ընտրողներին ուղղուած: Արդեօ՞ք անհրաժեշտութիւն չէք տեսնում հանրութեան լայն շրջանում այս օրէնքի փոփոխութեան մասին տեղեկատուութեան ապահովման համար եւ ի՞նչ մեքանիզմներով: Պէտք է հաշուի առնենք, որ քաղաքացիների այն խումբը, որին ուղղուած են այս խստացումները` կաշառք վերցնելու եւ խոստումներ տալու համաթեքսթում, հիմնականում քիչ են օգտւում համացանցից, եւ յոյս դնել միայն համացանցով տեղեկատուութեան ապահովման վրայ, թերի կը լինի: Կ’ուզէի հասկանալ` արդեօ՞ք նախատեսւում են հանրութեանը օրէնքի մէջ առաջարկուող փոփոխութիւնների մասին տեղեկատուութեան ապահովում եւ ի՞նչ մեքանիզմներով:

Չմոռանանք, որ ժամանակը շատ կարճ է, իսկ նման տեղեկատուութեան ապահովումն, ըստ ինձ, անհրաժեշտութիւն է»:

Tags

Argentina
Arménia y Diáspora