Արամ Ա. Կաթողիկոս կը մասնակցի Եկեղեցւոյ միութեան նուիրուած միջեկեղեցական արարողութեան
Երկար տարիներու աւանդութեան համաձայն, բոլոր եկեղեցիները յունուար ամսուան երրորդ շաբաթը նուիրած են եկեղեցւոյ միութեան աղօթքի շաբթուան: 
Այս շաբթուան ընթացքին, եկեղեցիներուն մէջ հոգեւորականներուն եւ ժողովուրդին մասնակցութեամբ յատուկ միջեկեղեցական արարողութիւններ տեղի կ՛ունենան եւ քարոզներ կը խօսուին` շեշտելով եկեղեցւոյ միութեան հրամայականը:
Լիբանանի մէջ եկեղեցւոյ միութեան շաբթուան բացումը կատարուեցաւ կիրակի, 18 յունուար 2015-ին, Պէյրութի ասորի ուղղափառ եկեղեցւոյ մէջ: Միջեկեղեցական արարողութեան ներկայ էին հոգեւոր պետեր, առաջնորդներ եւ հոգեւորականներ, ինչպէս նաեւ հաւատացեալներու հոծ բազմութիւն մը:
Սոյն արարողութեան իր մասնակցութիւնը բերաւ նաեւ Արամ Ա. կաթողիկոսը` իր կողքին ունենալով Լիբանանի հայոց թեմի առաջնորդ Շահէ եպս. Փանոսեանը եւ միաբան հայրեր: