Արսէն Համբարձումեան. “Ազգային համաձայնութեան կառավարութիւնից դուրս գալու հարց, այս պահին, օրակարգում չունենք”

15 de agosto de 2018

Arsen-HampartzoumianՀՅ Դաշնակցութեան Հայաստանի Գերագոյն մարմինի ներկայացուցիչ Արսէն Համբարձումեանի հետ «Ֆաքթոր»-ը (լրագրող Անի Սահակեան) զրուցած է ՀՅԴ Բիւրոյի ներկայացուցիչ Հրանդ Մարգարեանի եւ վարչապետ Նիկոլ Փաշինեանի յայտարարութիւններէն ետք ՀՅԴ-ի` Ազգային համաձայնութեան կառավարութեան մէջ մնալ-չմնալու եւ այլ հարցերու շուրջ: Հարցազրոյցը` ստորեւ:

ՀԱՐՑՈՒՄ.- Պարոն Համբարձումեան, վարչապետ Նիկոլ Փաշինեանը Տաւուշի մարզում պատասխանելով լրագրողի հարցին, որ համաձայնական դաշինքի գործընկեր Դաշնակցութեան Բիւրոյի ներկայացուցիչ Հրանդ Մարգարեանի կարծիքով` Հայաստանում տեսակէտ, կարծիք ու մտահոգութիւն յայտնելու առումով մտքի ահաբեկչութիւն է, ասաց, որ նրանք, ովքեր իրենց դուրս են համարում Ազգային համաձայնութիւնից (կառավարութիւնից այսինքն) ազատ են, ոչ մէկի ձեռքը չեն բռնել: Յաւելեց, որ Հայաստանում չկայ քոալիսիոն կառավարութիւն: Սա համարո՞ւմ էք քաղաքական ապահարզան:

ՊԱՏԱՍԽԱՆ.- Նախ, ուզում եմ արձանագրել, որ դա ձեր գնահատականն է: Այսինքն, որ դա պատասխանն էր Հրանդ Մարգարեանի ասածին: Եւ եկէք ենթադրութիւններ չանե՛նք: Հիմա ըստ էութեան. Հայաստանի ներկայ կառավարութիւնը քաղաքական ֆորս մաժորի արդիւնքում է ձեւաւորուել եւ, այն, բնականաբար, դասական իմաստով քաղաքական դաշինք չէ: Պայմանականօրէն այն ստացել է Ազգային համաձայնութեան կառավարութիւն անունը եւ դա ամրագրուած է նաեւ կառավարութեան գործունէութեան ծրագրում: Այս առումով, չեմ կարծում, որ որեւէ նոր բան է ասուել եւ յատուկ մեկնաբանման կարիք կայ: Իսկ առհասարակ, ցանկացած քաղաքական համագործակցութիւն մարտավարական բնոյթ ունի եւ թելադրուած է յստակ քաղաքական իրողութիւններով: Եւ բնական է, որ գործընկերային յարաբերութիւնների մէջ գտնուող քաղաքական ուժերը տարբեր հարցերի հետ կապուած կարող են ունենալ նաեւ տարբեր մօտեցումներ: Մանաւանդ այս պարագայում, երբ կողմերը կաշկանդուած չեն որեւէ համաձայնագրով: Եւ ոչ միայն Ռոպերթ Քոչարեանի, այլեւ Հայ առաքելական եկեղեցու, պարտադիր կուտակային համակարգի հետ կապուած հարցերում մենք մեր մօտեցումները հրապարակային արտայայտել ենք, եւ չի բացառւում, որ հետագայում եւս հանդէս գանք տարբեր մօտեցումներով: Եւ գործընկերութիւնն ամենեւին չի նշանակում բոլոր հարցերում միակարծութիւն: Եւ վաղն էլ տարբեր ցուցակներով ենք մասնակցելու Երեւանի աւագանու ընտրութիւններին:

Հ.- Ասում էք` նոր բան չի ասել, բայց նորն այն էր, որ ասաց` մենք ոչ մէկի ձեռքը չենք բռնում:

Պ.- Իսկ նախկինում ոեւէ մէկը ոեւէ մէկի ձեռքը բռնե՞լ է:

Հ.- Միգուցէ չի բռնել, բայց բոլորս յիշում ենք, թէ ինչպէս Նիկոլ Փաշինեանը պարտադիր կուտակային համակարգի հետ կապուած բաց թեքսթով, եւ անգամ` զայրացած` Հայաստանի Հանրապետութեան տնտեսական զարգացման եւ ներդրումների ձեր նախարարին ասաց, որ ոչ ոք չի կարող դէմ քուէարկել ընդունուող որոշումներին, չնայած ՀՅԴ-ական նախարարը նախապէս ասել էր, որ սկզբունքօրէն դէմ լինելով` կողմ է քուէարկելու:

Պ.- Արծուիկ Մինասեանն ասել է, որ դէմ է պարտադիր կուտակային համակարգին, նոր բերուած օրէնքի նախագիծը բոլորովին այլ բանի մասին էր, որ ժամանակաւոր լուծում է տրւում հետագայում պարտադիր կուտակային համակարգի հարցին բովանդակային անդրադարձ կատարելու համար: Այնպէս որ, եկէք ասուած ամէն մի բառ, ամէն մի արտայայտութիւն ճիշդ գնահատենք` տարակարծիք մեկնաբանութիւնների տեղիք չտալու համար:

Հ.- Ճիշդ գնահատե՛նք: Ուղղակի, երբ ասում էք` սա պատասխանը չէր Հրանդ Մարգարեանին, ապա ասեմ, որ հարց տրուեց, թէ ինչպէ՞ս է գնահատում Նիկոլ Փաշինեանը քոալիսիոն գործընկեր ՀՅԴ-ի Բիւրոյի ներկայացուցչի յայտարարութիւնը, ինչից յետոյ Նիկոլ Փաշինեանն ասաց այն, ինչ ասաց:

Պ.- Մենք էլ ասել ենք այն, ինչ ասել ենք: Եւ հիմա էլ ասում ենք, որ մեր համագործակցութիւնը միտուած է մէկ բանի, որպէսզի համաժողովրդական շարժման արդիւնքում սկսուած գործընթացները ճիշդ հունով գնան, որպէսզի չվտանգենք մեր անվտանգութիւնը, մեր երկիրն ու ժողովուրդն իրապէս շահեն եւ զարգացման նոր հնարաւորութիւններ ստեղծուեն: Եւ մենք հաւատացած ենք, որ իշխանութեան թէ՛ յաջողութիւնը, թէ՛ ձախողումը բոլորինս է: Եւ այս առումով, մեր մօտեցումներում ոչինչ չի փոխուել. թէ՛ 3 ամիս առաջ, թէ՛ հիմա: Եւ մենք անկեղծօրէն ամէն ինչ անում ենք, որ Հայաստանում սկսուած գործընթացները յաջողեն:

Հ.- Հետեւաբար, Ազգային համաձայնութեան կառավարութիւնը լքելու հարց շարքերում, կուսակցութիւնում չի բարձրացուել:

Պ.- Բնականաբար, իմ ասածների տրամաբանութեան շրջանակներում, Ազգային համաձայնութեան կառավարութիւնից դուրս գալու հարց, այս պահին, մեր օրակարգում չունենք:

Հ.- «ՀՅԴ սոցիալ-տնտեսական քաղաքականութեան հիմնադրոյթները»  նախագծի շնորհահանդէսին «Ծառուկեան» դաշինքը ներկայացուած էր Վահէ Էնֆիաջեանով, «Ելք»-ից, առհասարակ, մարդ չկար:

Պ.- Ոչ միայն «Ելք»-ից չկային: Բազմաթիւ այլ քաղաքական ուժեր եւս, ովքեր հրաւէրներ ստացել էին, տարբեր պատճառներով ներկայ չէին: Ներկայ չլինելու հետ կապուած հարցերը կարող էք ուղղել իրենց, ես այդտեղ որեւէ միտում չեմ տեսնում: Մանաւանդ, որ օգոստոս ամիսն է, եւ մարդկանց զգալի մասը հանգստի է մեկնել:

Հ.- Երեւանի աւագանու ՀՅԴ ցուցակը ե՞րբ կը հրապարակուի:

Պ.- Երբ յայտնի կը լինի կառավարութեան որոշումը, այն ժամանակ կը խօսենք:

Հ.- Այսուհանդերձ, շատ քաղաքական ուժեր հրապարակել են իրենց առաջին համարների անունները: Եւ հաշուի առնելով այս բազմազանութիւնը, ձեր թեկնածուն արդեօ՞ք մրցունակ կը լինի: Նո՞ր դէմք է, հասարակութեանը քաջ յայտնի՞:

Պ.- Առաջին հարցի հետ կապուած ասեմ, որ մենք շարժւում ենք օրէնքի տառին եւ ոգուն համահունչ: Իսկ միւս հարցի հետ կապուած` չկասկածէք: