ՀՅԴ Հայաստանի Գերագոյն Մարմինի Յայտարարութիւնը` Կառավարութեան ծրագիրին եւ կառուցուածքին վերաբերեալ

13 de febrero de 2019

ՀՅԴ-730x438ՀՅԴ Հայաստանի Գերագոյն մարմինը հետեւեալ յայտարարութիւնը տարածեց Հայաստանի կառավարութեան ծրագիրին եւ կառավարութեան կառուցուածքին մէջ նախատեսուող կրճատումներուն մասին:

Արտահերթ խորհրդարանական ընտրութիւնների արդիւնքներով կառավարութիւնը կազմաւորուեց` Սահմանադրութեան եւ օրէնքի կամայական մեկնաբանութեամբ, հիմք ընդունելով առաջիկայում իրականացուելիք կառուցուածքային փոփոխութիւնների մտադրութիւնը, իսկ իրականում մի շարք նախարարութիւնների գործունէութեան չհիմնաւորուած (սպասուելիք) դադարեցումը:

Հակառակ իշխող ուժի հնչեցրած մօտեցումներին եւ յանձնառութիւններին` կառավարութեան ծրագիրը չի անդրադառնում քաղաքական համակարգի բարեփոխումներին, անմիջական ժողովրդավարութեանը, մամուլի եւ խօսքի ազատութեանը, ընտրական համակարգին, սուփըրվարչապետութեան վերացմանը: Մի կողմից անտեսուել են խոստացուած բարեփոխումները, միւս կողմից` փորձ է արւում կառավարութիւնը փոխարինել վարչապետով` գերկեդրոնացնելով հաւաքական կառավարման մարմնի լիազօրութիւնները, ինչը կարող է վտանգել երկրի ժողովրդավարական զարգացման հեռանկարը:

Ծրագիրը բաւարար անդրադարձ չի կատարել ազգային անվտանգութեան ապահովմանը, այդ թւում` Արցախի Հանրապետութեան ռազմաքաղաքական անվտանգութեան երաշխաւորման մեքանիզմներին:

Բացթողումներ կան երկրի մշակութային, կրթական, գիտական զարգացման եւ սփիւռքի հետ կապերի ոլորտներում:

Նոր-ազատական գաղափարախօսութիւնից բխող, կրաւորական ընկերային-տնտեսական քաղաքականութիւնը, հակասելով Սահմանադրութեամբ ամրագրուած ընկերային շուկայական տնտեսակարգին, չի կարող Հայաստանում անհրաժեշտ տնտեսական զարգացում եւ ընկերային արդարութիւն ապահովել: Ազգային արդիւնքի բաշխման եւ ընկերային  արդարութեան հիմնահարցերի անտեսումը մեծացնելու է հասարակութեան բեւեռացումը, խորացնելու է հարուստների եւ աղքատների միջեւ գոյութիւն ունեցող անդունդը` վտանգելով հասարակութեան համերաշխութիւնը:

Թէեւ կառավարութիւնը իր առջեւ նպատակ է դրել իրականացնել «տնտեսական յեղափոխութիւն», սակայն ծրագիրը չի պատասխանում, թէ ի՞նչ է հասկացւում այդ եզրոյթի տակ, ինչպէ՞ս է այդ «յեղափոխութիւնն» իրականացուելու եւ ի՞նչ արդիւնք է այն արձանագրելու: Տնտեսութեան տարեկան 5% ակնկալուող աճը, որն արձանագրուած է ծրագրում, բաւարար չէ կառավարութեան տնտեսական քաղաքականութիւնը յեղափոխական կոչելու համար:

Ծրագիրը մշակուել է պատասխանատուութիւնից խուսափելու եւ հանրութեանը հաշուետու չլինելու մօտեցմամբ` հակասելով իշխող ուժի բազմիցս հնչեցրած հաւաստիացումներին: Ծրագրում բացակայում են յստակ թիրախներ, հանրային կեանքի որակի բարելաւումը բնութագրող նպատակադրումներ եւ ժամկէտներ, գերիշխում են յայտարարողական  բնոյթի յայտարարութիւններ: Այն պարունակում է ներքին հակասութիւններ ունեցող բազմաթիւ մտքեր:

ՀՅԴ Հայաստանի Գերագոյն մարմինն արձանագրում է, որ կառավարութեան ներկայացրած ծրագիրը բաւարար նախադրեալներ չի ապահովում «Զարգանալ` չզիջելով» կենսական սկզբունքի իրացման համար, եւ այն գնահատում է ժամանակի մարտահրաւէրներին ոչ համարժէք:

Վերը նշուած ամփոփ գնահատականների մանրամասներն ու հիմնաւորումները ՀՅԴ Հայաստանի Գերագոյն մարմինը կը ներկայացնի առանձին հարցազրոյցներով եւ հրապարակումներով:

ՀՅԴ ՀԱՅԱՍՏԱՆԻ ԳԵՐԱԳՈՅՆ ՄԱՐՄԻՆ

12 փետրուար 2019