ՀՅԴ-ն Կ՛առաջարկէ յստակացնել հանրաքուէներուն կարգը
Անհրաժեշտ է, որ Հայաստանի մէջ յստականայ հանրապետական հանրաքուէներուն կարգը: Այս մասին News.am-ի թղթակիցին հետ զրոյցի մը ընթացքին յայտարարեց ՀՅԴ խմբակցութեան պատգամաւոր Արծուիկ Մինասեան` մեկնաբանելով «Հանրաքուէի մասին» օրէնքին մէջ փոփոխութիւններու նախագիծը:
ՀՅԴ խմբակցութեան պատգամաւորներու եւ Ժառանգութիւն կուսակցութենէն պատգամաւոր Թեւան Պօղոսեանի կազմած փոփոխութիւններու նախագիծը կ՛առաջարկէ յստակացնել հանրաքուէներուն մասնակցութեան, քուէարկողներու ցուցակներու կազմութեան եւ արդիւնքներու հրապարակման կարգերը:
«Մենք կ՛առաջարկենք հանրապետական հանրաքուէներուն ընթացքին կիրարկել նոյն կարգը, ինչ ոչ համապետական ընտրութիւններուն ընթացքին կը գործադրուի: Այդ պարագային աւելի յստակ կը դառնայ, թէ ո՛վ կրնայ մասնակցիլ հանրաքուէին եւ ինչպէ՛ս: Այսօր նման յստակացում չկայ», յայտարարեց Մինասեան:
«Մեր բոլոր նախագահներն ալ գերնախագահներ
եղած են, ոչ թէ կիսանախագահներ»
Շաբաթ, 16 մայիսին, լրագրողներու հետ հանդիպումի մը ընթացքին Երեւանի պետական համալսարանի Սահմանադրական իրաւունքի ամպիոնի վարիչ Վարդան Այվազեան, խօսելով սահմանադրական բարեփոխումներուն մասին ընդգծեց, որ հանրութեան մօտ տարբեր կարծիքներ կան սահմանադրութեան փոփոխութեան անհրաժեշտութեան մասին, եւ շատերը այն կարծիքին են, որ ընդունուած օրէնքները լաւ են, սակայն արդիւնք չկայ: «Միայն բարեփոխումներով խնդիրները չեն լուծուիր, բարեփոխումներուն հետ միասին պէտք է ըլլան իրաւական համակարգի բարեփոխումներ, որոնց իրականացման համար նախ եւ առաջ անհրաժեշտ է շեշտը ոչ թէ գեղեցիկ բառախաղի վրայ դնել, այլ այնպիսի մեքանիզմներու վրայ, որոնք կ՛ապահովեն սահմանադրութեան կենսունակութիւնը: Այն դիտարկմանը, որ ընդդիմութեան մէկ մասը կը կարծէ, որ սահմանադրական փոփոխութիւնները ուղղուած են իշխանութեան դիրքերու յաւերժացման, սահմանադրագէտը նշեց, որ ատիկա կը վկայէ սահմանադրութեան վերաբերեալ ընդդիմութեան մէկ մասի ոչ բաւարար գիտելիքներուն մասին, որովհետեւ սահմանադրական փոփոխութիւնները համակարգային բնոյթ ունին: Անոր խօսքով` խորհդարանական համակարգի պարագային կը բացառուի երկրին համար ճակատագրական որոշումներուն ժամանակ միանձնեայ որոշումներ կայացնելը:
Պատասխանելով այն հարցումին, թէ ինչպէ՞ս բացատրել այդ պարագային Սերժ Սարգսեանի այն մտավախութիւնը, որ երկրի ներքին ու արտաքին անկայունութեան պարագային յստակ չէ, թէ ո՛վ պէտք է որոշում կայացնէ, ասուլիսի միւս բանախօսը, Ազգային ժողովի ՀՅԴ խմբակցութեան պատգամաւոր Արծուիկ Մինասեան նկատեց, որ հարցը չարախօսութիւն կը պարունակէ. «Ես չեմ անդրադառնար չարախօսութեան, միայն կ՛ըսեմ հետեւեալը` նախագահը, երբ իր մտահոգութիւնները կ՛արտայայտէր, մէկ նախադասութիւն ըսաւ, որուն քիչ ուշադրութիւն կը տրուի, ան յայտարարեց, որ մինչեւ այդ պահը ոեւէ մէկը հայեցակարգի վերաբերեալ առարկութիւն չէ ներկայացուցած, այսինքն` այն քաղաքական ուժերը, որոնք դէմ էին խորհրդարանական համակարգին, ի վերջոյ 60-70 հարց է փոփոխութիւններու ծրարին մէջ, երբ ոչ մէկ բան կը ներկայացնես, կը նշանակէ համակարծիք ես, Սարգսեանի այդ արտայայտութիւնը որ ոեւէ մէկը չէ առարկած հայեցակարգին, կը նշանակէ անիկա ենթակայ է վաւերացման», ըսաւ ան: Արծուիկ Մինասեան նաեւ կարծիք յայտնեց, որ թէեւ մինչեւ հիմա Հայաստանի մէջ եղած է կիսանախագահական կառավարման համակարգ, այնուամենայնիւ նախագահները իշխանութեան լիարժէք կրողներ եղած են: «Կիսանախագահական կը նշանակէ կիսանախագահ, չեմ կարծեր, որ մեր նախագահները «կիսա» եղած են, մեր բոլոր նախագահներն ալ գերգլուխներ եղած են, ոչ թէ «կիսա», ըսաւ Արծուիկ Մինասեան: