Մխիթարեանի Շապիկներով Համակիրներ Պաքուի Մէջ Կը Հարցաքննուին
Ինչպէս ծանօթ է, Ատրպէյճանի մայրաքաղաք Պաքուի մէջ, 29 Մայիսին տեղի ունեցած ֆութպոլի «Եուրոփա» մրցաշարքի աւարտական մրցումին վայրին ընտրութիւնը միջազգային դատապարտումի ալիք ստեղծեց։
Անգլիական «Արսենալ» եւ «Չելսի» խումբերուն միջեւ մրցումին ներկայ ըլլալու համար, Ատրպէյճան երթալ փորձած հայազգի համակիրներուն մուտքի արտօնութիւն չտրուեցաւ, իսկ Պաքու բաւարար երաշխիքներ չկրցաւ տալ «Արսենալ»ի հայազգի աստղ Հենրիկ Մխիթարեանի ապահովութեան համար։
Թէեւ Մխիթարեան անձամբ ներկայ չէր, բայց նոյնիսկ իր շապիկները կրող ֆութպոլասէրները հալածանքի ենթարկուեցան Պաքուի ոստիկանութեան կողմէ։ Արդարեւ, համացանցին վրայ մեծ տարածում գտաւ տեսանիւթ մը, որուն մէջ ատրպէյճանցի ոստիկաններ կը կեցնեն եւ կը հարցաքննեն «Արսենալ»ի՝ Մխիթարեանի անունով շապիկ հագած համակիր մը։ Միւս կողմէ, «Արսենալ»ի եւ «Չելսի»ի մարզասէրներ, ի պաշտպանութիւն Մխիթարեանի եւ ի նշան բողոքի՝ վերադարձուցին մօտաւորապէս 5800 տոմսակներ։
Նաեւ, աւարտական մրցումէն անմիջապէս առաջ, «Արսենալ»ի համակիրները Պաքուի մէջ երգեցին «Մենք Ղարաբաղ եղած ենք» եւ հիմա «Պաքու ենք, հոսկէ «Եուրոփա»ի բաժակը տուն տանելու համար»։ Յիշեցնենք, որ «Արսենալ»ը աւարտականի ճամբուն վրայ պարտութեան մատնած էր Ատրպէյճանի «Ղարաբաղ» խումբը։ Մինչ այդ, անգլիական «Տէյլի Մէյլ» թերթը կը գրէ, որ ԵՈՒԵՖԱն «Արսենալ» խումբին արգիլեց Պաքուի մէջ որեւէ արշաւ կազմակերպել՝ իբրեւ զօրակցութիւն աւարտականին մասնակցելու իր իրաւունքը կորսնցուցած Մխիթարեանին։ Կը նշուի, որ խումբին անդամները քննարկած էին, թէ ինչպէ՞ս կարելի է աջակցութիւն ցոյց տալ հայ միջնապահին. որոշուեցաւ մրցումէն առաջ կատարուելիք փորձերուն ընթացքին Մխիթարեանի անունով շապիկներ կրել։
Ատրպէյճանագէտ Անճելա Էլիպեքովա կը գրէ, թէ մինչ Պաքու հսկայ գումարներ կը ծախսէ իր միջազգային վարկը բարելաւելու համար, Մխիթարեանի հարցով ստեղծուած գայթակղութիւնը հարուած մը եւս հասցուց անոր վարկին։ Ան կը շեշտէ, թէ միջադէպը բացայայտեց, որ լրջութեամբ կարելի չէ մօտենալ խաղաղութիւն հաստատելու մասին Պաքուի յայտարարութիւններուն, որովհետեւ նոյնիսկ հայկական անուն ունեցողները չկրցան Պաքու մուտք գործել Ատրպէյճանի հայատեաց քաղաքականութեան իբրեւ հետեւանք։ «Ատրպէյճանի իշխանութիւնները կը գիտակցէին, որ պիտի չկարենան Պաքուի մէջ երաշխաւորել հայերու ապահովութիւնը, որովհետեւ իրենց ժողովուրդը ատելութեամբ լեցուցած են հայերու դէմ», կ՛աւելցնէ ան։