Նիկոլ Փաշինեանի հետ խօսակցութիւնը ստացուեց. յոյս ունեմ այն կը շարունակուի
Ես այսօր յաջողեցի հանդիպել Նիկոլ Փաշինեանի հետ, մեր խօսակցութիւնը ստացուեց եւ յոյս ունեմ, որ այն շարունակուի, թէպէտ առայժմ կոնկրէտ արդիւնքներ չկան: Մենք անցած 5-6 օրուայ ընթացքում այս տեսակի ծաւալուն աշխատանքների մէջ ենք եղել զանազան կողմերի հետ, զանազան անձերի հետ, որպէսզի կարողանանք լուծում գտնել երկրի առջեւ կանգնած այս թնջուկին:
Կարեւորն այն է, որ մենք, իբրեւ Դաշնակցութիւն, համաձայն չենք ձերբակալութիւնների հետ, նաեւ դէմ ենք, երբ վերջնագրերով են խօսում: Մենք հաւատում ենք, որ անհրաժեշտ է երկխօսութիւն` յանուն այս երկրի ու ժողովրդի: Պէտք է մենք կարողանանք սթափուել, առիթ տանք, որ այդ երկխօսութիւնը տեղի ունենա, որ այդ լուծումը մենք գտնենք ու երկիրը ցնցումների չտանենք:
Կարեւոր է այսօր եւ այս պահին, որ փողոցը շատ աւելի զգոյշ լինի, ժողովրդային շարժումը շատ աւելի զգոյշ լինի, սադրանքների չենթարկուի, խաղաղ բնոյթը պահպանի, որպէսզի հնարաւորութիւն ստեղծենք, որ լուծում գտնուի:
Մենք ամէն ինչ անում ենք եւ այսպիսի ճիգ ու ջանքի մէջ ոչ անհատական ու ոչ էլ կուսակցական շահն է, որ խնդիր է: Երկիրն ու մեր ժողովուրդն է, որ հիմնական արժէք է, մենք դրան ենք հաւատում եւ դա է, որ պէտք է համոզում դարձնենք բոլորին, որ յանուն երկրի եւ ժողովրդի բոլորը պէտք է զիջեն, ինչ-որ բանից պէտք է զիջեն, որ ելք գտնուի:
Ի դէպ, մեր տեղեկութիւններով` Նիկոլ Փաշինեանի, Արարատ Միրզոյեանի եւ Սասուն Միքայեյեանի կալանաւորման օրակարգով Ազգային Ժողովի արտահերթ նիստ չի նախատեսւում եւ նրանց անձեռնմխելիութիւնից զրկելու հարցը չի ընդգրկուելու խորհրդարանի օրակարգում: