Շահումեանի շրջանի բազմազաւակ ընտանիքներու համար բնակարաններ կը կառուցուին

28 de marzo de 2019

Viviendas-Shahumian
ԱՀ պետական պիւտճէի միջոցներով՝ Շահումեանի շրջանին մէջ՝ բազմազաւակ ընտանիքներու համար կը շարունակուին կառուցել բնակարաններ: Այս մասին, ըստ Artsakhpress.am-ի՝ ըսած է Շահումեանի շրջանի վարչակազմի քաղաքաշինութեան եւ ճարտարապետութեան բաժինի վարիչ Հրայր Ասրեան՝ նշելով, որ ծրագիրը խթան կը հանդիսանայ ծնելիութեան եւ բազմազաւակութեան աճին համար:

Ան տեղեկացուցած է, որ ներկայիս շրջանի Նոր Վերինշեն, Չարեքտար, Նոր Մանաշիդ, Նոր Էրքէջ, Նոր Խարխափուտ, Ակնաբերդ համայնքներուն մէջ, բազմազաւակ 8 ընտանիքի համար կ՝իրականացուին բնակարաններու կառուցման աշխատանքներ:

 «Վերոնշեալ համայնքներու բնակարաններու կառուցման աշխատանքներուն շուրջ 80%-ը աւարտման փուլի մէջ է: Ներկայիս կը կատարուին ներքին ու արտաքին յարդարման եւ տարածքներու  բարեկարգման աշխատանքներ: Բնակարանները նախատեսուած է շահագործման յանձնել ընթացիկ տարին»,- աւելցուցած է պատասխանատուն եւ նշած, որ 2000-2018 թուականներուն պետական պիւտճէի միջոցներով՝ շրջանին մէջ կառուցուած է շուրջ 49 բնակարան: