Սպարտակ Սէյրանեան. “Նպատակ ունին ազգային աւանդական կառոյցները դուրս մղել ազգային կեանքէն”
Ազգային ժողովի յայտարարութիւններու ընթացքին ՀՅԴ-ի խմբակցութեան պատգամաւոր Սպարտակ Սէյրանեանի ելոյթը կը ներկայացնենք ամբողջութեամբ:
«Վերջին շրջանում ականատեսն ենք շատ մտահոգիչ ու հնարաւոր հետեւանքների իմաստով խիստ վտանգաւոր իրողութեան: Համապարփակ եւ բազմաշերտ քարոզչութիւն է իրականացւում Հայաստանի Հանրապետութիւնում, Արցախում, Ջաւախքում, աւանդական եւ նոր սփիւռքում գործող` համահայկական ընդգրկում ունեցող հոգեւոր, քաղաքական, մշակութային, բարեգործական կառոյցների, կազմակերպութիւնների եւ հաստատութիւնների դէմ, որոնք, անշուշտ, բոլորին յայտնի են:
«Նախկինում բազմիցս դիտարկուած այս գործընթացի ներկայիս առանձնայատկութիւնն այն է, որ փորձ է արւում այն նմանեցնել, նոյնիսկ նոյնականացնել Հայաստանում տեղի ունեցած համաժողովրդական շարժման ձեւերին, հռետորաբանութեանը եւ պայքարի մեթոտներին` դրանով իսկ միտում ունենալով վաւերականացնել, հանրութեան աչքում արդարացնել այն, աւելի՛ն` ստանալ հանրութեան աջակցութիւնը:
«Անշուշտ, սակայն, այս ամէնն ունի բոլորովին այլ նպատակադրումներ: Դրանք են` սերմանել անվստահութիւն համահայկական այս կառոյցների հանդէպ, խոչընդոտել դրանց բնականոն գործունէութեանը եւ որպէս արդիւնք` ազգային աւանդական կառոյցներին դուրս մղել ազգային կեանքից:
«Եղածը քանդելու, փոխարէնը որեւէ գործուն մեքանիզմ չներկայացնելու այս մեթոտաբանութիւնը խիստ վտանգաւորն է: Օգտուելով առարկայական եւ ենթակայական դժուարութիւններից, խնդիրներից, անհատական կամ խմբային շահախնդրութիւնների հետապնդման ճանապարհով փորձ է արւում խարխլել սերունդների ջանքերով ստեղծուած կառոյցներն ու թուլացնել նրանց ձեռքբերումների դերն ու նշանակութիւնը հայութեան կեանքում:
«Այս համապարփակ հակաքարոզչութեան երեւացող թիրախներն անձինք են կամ առանձին խմբեր, սակայն քարոզչութիւնն ունի հաստատութենական բնոյթ. խաթարել այն, կրկնում եմ` համահայկական ընդգրկում եւ տարածուածութիւն ունեցող կառոյցների գործունէութիւնը, որոնք սերնդէ սերունդ իրականացրել են կարեւորագոյն մէկ գործառոյթ` ոչ միայն հայապահպանութիւն սփիւռքում, ոչ միայն ի նպաստ Հայաստանի ու Արցախի գործունէութիւն տարբեր երկրների պետական, քաղաքական, հոգեւոր, հասարակական, գիտակրթական, մշակութային միջավայրերում, այլեւ անփոխարինելի կամուրջ` մի կողմից Հայաստանի Հանրապետութեան քաղաքական, պետական, հոգեւոր, գիտակրթական, մշակութային կառոյցների ու հասարակական միւս հաստատութիւնների եւ մեր աշխարհասփիւռ հայութեան, միւս կողմից` վերջիններիս միջոցով աշխարհի միջեւ:
«Ազգային կառոյցների հանդէպ այս ապազգային միտում ունեցող հերթական քարոզարշաւը նպատակ ունի նաեւ սահմանափակել դրանց ազդեցութիւնը երկրի եւ հասարակութեան կեանքում: Այս գործընթացը վտանգաւոր է նաեւ մեր պետականութեան համար` յարափոփոխ, բազմաթիւ վտանգներով, մարտահրաւէրներով լի մեր ժամանակներում:
«Ուստի այս հակաքարոզչութեան դէմ անհրաժեշտ է միաւորել ոչ միայն ազգային բոլոր կառոյցներին, այլեւ ունենալ պետութեան աջակցութիւնն ու քաղաքական համապատասխան լուրջ խորքային քաղաքական ծրագրաւորումը: Ծրագրաւորում, որը ոչ միայն կը չէզոքացնի այս վտանգաւոր միտումները, այլեւ նոր բովանդակութիւն, նոր մեթոտաբանութիւն, նոր նշաձող ու լիցք կը հաղորդի համահայկական ազգային կառոյցներին` հաշուի առնելով ժամանակակից աշխարհի միտումներն ու Հայաստանի ու հայութեան առջեւ կանգնած նոր մարտահրաւէրները: Որովհետեւ համահայկական տարածում ունեցող ազգային կառոյցները ունեն նաեւ կարեւորագոյն մէկ գործառոյթ եւս` ամրապնդել մեր պետականութիւնը, բազմապատկել պետութեան կարողականութիւնը, համալրել հայրենիք-սփիւռք կապերը` իրենց փորձով, բովանդակային գործունէութեամբ ու գաղափարախօսութեամբ»: