Սպարտակ Սէյրանեան. “Ոգիով աշխատիլը կարեւոր է, բայց անհրաժեշտ է աւելի մեծ ոգի ունենալ ընդունելու սխալները”
Այսօր՝ 7 Յունիսին ՀՀ Ազգային ժողովին կառավարութեան ծրագիրի քննարկումին ընթացքին, ՀՅԴ խմբակցութեան պատգամաւոր Սպարտակ Սէյրանեան ըսաւ, որ այս կառավարութեան ծրագիրը ինծի համար աւելի շատ տեսլական է:
«Ծրագիրին մէջ պէտք է թուարկուին այն գործիքներն ու գործիքակազմը, որոնցմով այդ ծրագիրին ժամանակացոյցը պէտք է կեանքի կոչուի: Կարեւոր են նաեւ ժամկէտերը եւ պարբերաբար հաշուետուութիւնը», ընդգծեց Սէյրանեան:
Սպարտակ Սէյրանեան համաձայն չգտնուեցաւ ծրագրային այն դրոյթին, որուն համաձայն, մշակոյթին հետ սոսկ կապ ունենալը կը դիտուի որպէս մշակութային քաղաքականութեան գերակայ սկզբունք: «Շեշտադրումը պէտք է ըլլայ քաղաքացիին արարումին վրայ: Ստեղծեցէք բոլոր այն պայմանները, որոնց լոյսին տակ ստեղծագործ մարդը կարենայ արարել: Մշակոյթի մէջ եկէք գոնէ բացառենք մրցակցութիւնը, ամբողջ աշխարհը կ՚ուղղուի դէպի համագործակցութիւն: Միւս հարցը մշակութային օճախներու պահպանման հարցն է, որ պէտք չէ չդրուի միայն պետութեան ուսերուն: Խիստ վտանգաւոր է մեր մշակոյթին նման հարուստ մշակոյթի թանգարանայնացման գործընթացը, մենք մեր մշակոյթը պէտք չէ խցկենք ցուցափեղկերու տակ»:
Սէյրանեան ըսաւ, որ իրեն համար բոլորովին կարեւոր չէ, թէ որեւէ մշակութային անճաշակ նախագիծ ինչպիսի՛ թափանցիկութեամբ կեանքի կը կոչուի: «Ոգիով աշխատիլը շատ կարեւոր է, բայց շատ աւելի մեծ ոգի ու խոհեմութիւն կը պահանջէ սխալներ ընդունիլը, բոլորին լսելը՝ խորհուրդներու, առաջարկներու իմաստով»: