Վանի Ս. Խաչ եկեղեցւոյ մէջ երեք տարուան դադարէ ետք կրնայ դարձեալ պատարագ մատուցուիլ
Վանի Աղթամար կղզիի Ս. Խաչ եկեղեցւոյ մէջ երեք տարուան դադարէ ետք կրնայ դարձեալ պատարագ մատուցուիլ: Այս մասին կը հաղորդէ «Ակօս»` մանրամասնելով, որ ատիկա կրնայ տեղի ունենալ 9 սեպտեմբերին:
Վանի նահանգապետ Մուրատ Զորլուօղլու յայտնած է, որ իրենք արդէն համապատասխան քննարկումներ կատարած են Պոլսոյ հայ համայնքին հետ` այս տարի Ս. Խաչի մէջ դարձեալ պատարագ կազմակերպելու հարցին շուրջ: Այժմ բանակցութիւններ կը վարուին նաեւ համապատասխան նախարարութիւններու հետ:
Պոլսոյ հայոց պատրիարքարանէն ալ յայտնած են, որ իրենք արդէն պատրաստութիւններ կը տեսնեն պատարագի կազմակերպման համար:
Պատրիարքարանը 9 սեպտեմբերին տեղի ունենալիք պատարագին վերաբերեալ պաշտօնական հաղորդագրութիւն եւ մասնակցութեան կոչ պիտի հրապարակէ միւս շաբաթ: