Փաշինեան եւ Ալիեւ 29 Մարտին Աւստրիոյ նախագահին հետ հանդիպում պիտի ունենան
«Երկիր» կը հաղորդէ, որ Աւստրիոյ նախագահական կայքէն տեղեկացած է, թէ 29 մարտին Վիեննայի մէջ Աւստրիոյ նախագահ Ալեքսանտր Վան տեր Պելեն հանդիպում պիտի ունենայ Հայաստանի վարչապետ Նիկոլ Փաշինեանի եւ Ազրպէյճանի նախագահ Իլհամ Ալիեւի հետ:
Ըստ կայքին, Աւստրիոյ նախագահական պալատին մէջ 29 մարտին` ժամը 15:15 եւ 18:30-ին, նախատեսուած են Փաշինեանի եւ Ալիեւի մամլոյ ասուլիսները: Ենթադրելի է, որ նախքան ասուլիսը երկու երկիրներու ղեկավարները հանդիպում ունենան Աւստրիոյ նախագահին հետ: Սակայն տակաւին յստակ չէ, թէ Հայաստանի ու Ազրպէյճանի ղեկավարներու երկկողմանի կամ եռակողմանի հանդիպում նախատեսուա՞ծ է, թէ՞ ոչ:
«Երկիր» նման հանդիպումի մը մասին հարցում ուղղած է նաեւ Հայաստանի վարչապետ Փաշինեանի մամլոյ բանբերին, սակայն չէզոք պատասխան ստացած է: Սակայն երէկ հաստատուեցաւ, որ 28 մարտին վարչապետ Փաշինեան պիտի մեկնի Վիեննա: