Ֆրանսա: «Marianne»ի յատուկ թիւը նուիրուած՝ Հայոց Ցեղասպանութեան 100ամեակին
Ֆրանսական ծանօթ «Marianne» շաբաթաթերթը «Հայերը. ֆրանսական պատմութիւն մը» ընդհանուր խորագիրը կրող 100 էջնոց յատուկ թիւ մը հրապարակած է, նուիրուած՝ Հայոց Ցեղասպանութեան 100ամեակին:
Ներկայացման գրութեան մէջ կ՚ըսուի հետեւեալը.- «Ֆրանսայի եւ Հայաստանի միջեւ գոյութիւն ունի բազմադարեան ուխտ մը։ Անկասկած, այն պատճառով, որ այս երկու ազգերը կը խանգարեն համաշխարհային մեծ անկարգութիւնը եւ կը մերժեն անհետանալ Պատմութենէն։
ԺԱ. դարու սկիզբէն, այդ դաշնակցութիւնը կնքուած է առաջին Կապետինգներու եւ Բագրատուներու շառաւիղներուն միջեւ, որոնք իշխեցին Կիլիկիոյ հայկական
թագաւորութեան։ Այն, ինչ որ կը հիւսէ այսքան սերտ կապեր Հայաստանի եւ Ֆրանսայի միջեւ, ըստ ամենայնի՝ դիմադրութեան այդ ոգին է։ Դիմադրական մեր այդ հասարակաց ոգիին պատճառով է, որ միշտ ալ Հայերը՝ անոնք ըլլան Սուրիայէն, Լիբանանէն, Թուրքիայէն, Իրանէն թէ Ռուսաստանէն ժամանած, անմիջապէս ներգրաւուած են Ֆրանսայի ամենէն խորին հոսանքին մէջ. այն աստիճան, որ այսուհետեւ կրնանք գրել, թէ այսօր առանց անոնց ներկայութեան, մեր երկիրը պիտի չըլլար այն ինչ որ է։
Բայց օրինակելի այս համարկումէն անդին, յաւելեալ երկու պատճառներ կան հետաքրքրուելու համար այս հայրենակիցներով։ Առաջինը, անշուշտ, Հայոց Ցեղաս- պանութեան 100ամեակն է։ Երկրորդը՝ աւելի նոր յայտնուած երեւոյթ մըն է, նոյնիսկ եթէ կը վերաբերի շատ հին մարտիրոսութեան։ Անոնք, որոնք հետաքրքրութիւ- նը ունեցած են հրելու դռները Փարիզի Ժան-Կուժոնի եկեղեցւոյ եւ հրապուրուած են շարականներու գեղեցկութեամբ, արբեցած՝ խունկի ոլորապտոյտ բոյրով, գիտեն որ Հայերը Արեւելքի քրիստոնեաներ են։ Անոնք անոնցմէ են, որոնք իսլմապաշտներու նախընտրած թիրախներն են։ Անոնցմով եւ անո՛նց շնորհիւ՝ մեր սրտերուն մէջ կ՚արձագանգէ քրիստոնեայ Արեւելքը»։