“Հայաստա՛նը իմ տունս է”
Փետրուար 2ին, «Հայրենադարձները` տուն դարձածները» շաբթուան ծիրէն ներս, Հ.Հ. սփիւռքի նախարարութեան հրաւէրով տեղի ունեցաւ հանդիպում՝ Հայաստան հաստատուած բազմաթիւ հայրենադարձներու հետ:
Ողջունելով ներկաները` Հ.Հ. սփիւռքի նախարար Հրանոյշ Յակոբեան նշեց.- «Դահլիճին մէջ ներկայ են հայրենիքի մէջ հաստատուած մեր հայրենակիցները աշխարհի բազմաթիւ երկիրներէ: Հայրենիքի մէջ ապրելու որոշումով՝ դուք աշխարհին ու Հայաստանին ցոյց տուած էք ձեր մարդկային բնութագիրը: Եւ մեր այս հաւաքը կու գայ փաստելու, որ Հայաստան նաեւ կը վերադառնա՛ն: Դուք եկած էք, որ մասնակից ըլլաք հայրենիքի շէնացման գործին, ձեր ներդրումը ունենալու մեր հայրենիքի զարգացման։ Եկած էք, որպէսզի ձեր հողին, ձեր ջուրին, ձեր ինքնութեան, ձեր արմատին աւելիով կառչած մնաք։ Մենք մեր երկրին մէջ պարտաւոր ենք պահպանելու լաւը, իսկ վատը շտկելու` մշտապէս առաջ մղելով «Հայաստա՛նն է իմ տունը» կարգախօսը: Հայաստանի մէջ, վերջին 4-5 տարիներուն, հաստատուեցան նաեւ 22 հազար սուրիահայեր, եւ ես ուրախ եմ, որ իրենց հետ մեր հայրենակիցները բերին ապրելու, ստեղծագործելու նոր մշակոյթ եւ նոր մօտեցումներ»:
Նախարարը՝ տեսանիւթի միջոցով՝ յիշեցուց յայտնի բարերարներ Քըրք Քրքորեանը, Էտուարտօ Էռնեկեանը, Սամուէլ Կարապետեանը, Ռուբէն Վարդանեանը, Վաչէ Մանուկեանը, Սեմ Սիմոնեանը, Ճերարտ Գաֆէսճեանը, Վահագն Յովնանեանը, Սերգէյ Համբարձումեանը, Լեւոն Հայրապետեանը, Սերգէյ եւ Նիքոլայ Սարգիսով եղբայրները ու շատ ուրիշներ, որոնք իրենց կատարած մեծ բարերարութեամբ ու ներդրումներով՝ նպաստած են հայրենիքի զարգացման գործին։
Ներկաները դիտեցին տեսանիւթ, ուր բազմաթիւ հայրենադարձներ ներկայացուցին իրենց հայրենադարձման շարժառիթները:
Ապա խօսք առին շատ մը հայրենադարձներ՝ անդրադառնալով իրենց Հայաստան հաստատուելու որոշումին եւ հոս ունեցած իրենց կեանքի փոփոխութեան ու որակին։