Թուրք ազգայնամոլները քարերով յարձակած են եկեղեցիէն դուրս եկող հայերու դէմ
Պոլսոյ հայկական եկեղեցիներէն մէկու մուտքին մօտ, խումբ մը թուրք ազգայնամոլներ քարերով յարձակած են եկեղեցիէն դուրս եկող հայերու դէմ: Այս մասին կը հաղորդէ թրքական «Արթիկերեճեք» կայքը:
Լրատուամիջոցներուն այս մասին յայտնած է պոլսահայ գործիչ Երուանդ Էօզուզուն` Թուրքիոյ գլխաւոր ընդդիմադիր Հանրապետական-Ժողովրդական Կուսակցութեան հայ երեսփոխան Սելինա Տողանի հայրը:
Պոլսոյ Ս. Յովհաննէս հայկական եկեղեցւոյ մուտքին մօտ քարկոծուած պոլսահայերը եկեղեցի եկած էին՝ Խաչվերացի տօնին առիթով երեկոյեան կազմակերպուած պատարագին:
Յայտնի է, որ դրան մօտ սպասած ազգայնամոլները քարեր նետած են հայերուն վրայ եւ բացագանչած.- «Մա՛հ ձեզի»: «Սովորաբար կիրակնօրեայ Պատարագներու ժամանակ մինչեւ Պատարագի աւարտը հայկական եկեղեցիներու մուտքին մօտ անվտանգութեան ուժերը պահակութիւն կ՛ընեն:
Պետութեան պարտականութիւնն է ապահովել քաղաքացիի անձին եւ ունեցուածքին անվտանգութիւնը: Ասիկա մեզ կ՛ուրախացնէ` ի՜նչ խօսք: Սակայն այլ հարց, թէ ինչո՛ւ իրավիճակը այնպիսին է, որ առանց ոստիկանի պահակութեան մեր իսկ հողերուն վրայ չենք կրնար հանգիստ սրտով եկեղեցական Պատարագ ընել»,- «Արթիկերեճեք»ի հետ զրոյցին ընթացքին նշած է Էօզուզուն: