Միջազգային երաշխաւորութեամբ գործարկել Ստեփանակերտի Օդակայանը
Ազդակի Ակնարկ
Հայկական ուղղաթիռի խոցումը ազրպէյճանական ուժերուն կողմէ զինադադարի հերթական խախտումներու ծիրէն դուրս կու գայ. ոչ անպայման այն իմաստով, որ ասիկա արձակազէններու գործողութիւններէն կամ անդադրում կրակահերթերէն տարբեր է: Այլ` յատուկ քաղաքական նպատակ հետապնդող քայլ է, առնուած Պաքուի իշխանութիւններուն կողմէ:
Դէպքի հանգամանքները պարզելը անշուշտ օգտակար է: Նկատելը, որ զինուած ուղղաթիռ չէր, որ ազրպէյճանական սահմանը չէր հատած, որ Ազրպէյճան այդ բոլորին հակառակը փաստելու համար պետական բարձրագոյն մակարդակով կազմակերպեց տեսանիւթային ապատեղեկատուութիւն հետզհետէ աւելի պարզ եւ համոզիչ կը դառնայ բոլորին համար:
Խնդիրը այն է, որ առաջին անգամը չէ, որ ուսումնավարժական թռիչքներ կը կատարեն հայկական ուղղաթիռները օդային նոյն տարածքներու սահմաններուն մէջ: Թէ Պաքուն ի՞նչ կը նպատակադրէ այս հարուածով, որոշ չափով պարզ կը դառնայ, եթէ կարդանք ազրպէյճանական աղբիւրներուն հրապարակած հետեւեալ հաղորդագրութիւնը:
«Ազրպէյճանի արտաքին գործոց նախարարութիւնը 12 նոյեմբերին հայկական ուղղաթիռի կործանման կապակցութեամբ յայտարարութիւն մը տարածած է, որուն մէջ ոչ թռիչքային գօտի է յայտարարել «բռնագրաւուած տարածքներու օդային տարածութիւնը եւ ըստ սահմանուած կարգի այդ մասին տեղեակ պահած է Քաղաքացիական օդանաւորդութեան միջազգային կազմակերպութեան անդամները»:
Ուրեմն հարուածել հայկական ուղղաթիռը` պատրուակելով, որ զինուած է անիկա եւ թէ հատած է ազրպէյճանական սահման կամ «բռնագրաւեալ տարածք», յայտարարելու համար ոչ թռիչքային գօտի:
Պաքուն անհանգիստ է Արցախի օդային տարածքի գործարկման հաւանականութեան բարձրացման դիմաց: Խնդիրը կը վերաբերի ոչ միայն հայկական ուղղաթիռներուն, այլ նաեւ քաղաքացիական ճամբորդատար թռիչքներու իրականացման. պարզ խօսքով` Ստեփանակերտի օդակայանի գործարկման:
Հիմա այն պահն է, որ հայկական կողմը առաւելագոյն քաղաքական աշխատանքներ ծաւալէ պահանջելու միջազգային երաշխիք Արցախի օդային տարածքի անվտանգութեան համար: Հիմա պահն է, որ պատասխանատուութիւններու համահաւասարեցման խաղը կանգ առնէ եւ իրերը կոչուին իրենց անուններով: Պատասխանատուութեան մատնանշումին բնականաբար կը յաջորդէ դատապարտում: Ուսումնավարժողական նպատակով թռիչք իրականացնող ուղղաթիռի խոցումներ կանխարգիլելու համար միջազգային հանրութիւնը պէտք է երաշխաւորէ օդային անվտանգ տարածք Արցախին:
Ուրեմն, եթէ հայկական ուղղաթիռի խոցումով Պաքուն կը հետապնդէր Արցախը ոչ թռիչքային գօտի յայտարարել, հայկական կողմը, պետական, հասարակական եւ սփիւռքեան լոպիինկի ուժերու լարումով այս պահը լիարժէք պէտք է օգտագործէ ապահովելու համար Արցախի թռիչքային անվտանգ գօտի յայտարարութիւնը:
Միանշանակ համոզիչ է ու արդարացուած, որ պատասխանը ցաւոտ պիտի ըլլայ Ազրպէյճանի համար, որուն զինուորաքաղաքական իշխանութիւնները կը կրեն ամբողջ պատասխանատուութիւնը պատահարին եւ անկէ բխելիք բոլոր հետեւանքներուն: Արդար են նաեւ իւրաքանչիւր հայ զոհի փոխարէն յաւելեալ դիրքեր նուաճելու նախապէս յայտարարուած եւ այժմ պահանջի վերածուած տրամադրութիւնները:
Հայկական ուղղաթիռի պատահարը սահմանային հերթական դէպք չէ: Քաղաքական նպատակաուղղուածութեամբ իրականացած գործողութիւն է: Հայկական համարժէք պատասխաններուն առընթեր քաղաքական առաւել ապահովելու հրամայականը ինքզինք զգալի կը դարձնէ: Այդ առաւելը Արցախի թռիչքային գօտիի ապահովումն է: Միջազգային երաշխաւորութիւններով Ստեփանակերտի օդակայանի գործարկումը:
«Ա.»