ՀՅԴ Բիւրոյի Յայտարարութիւն. «Գերեվարուած հայերը փաստացի պատանդներ են Ազրպէյճանի ձեռքում»

Մէկ տարուց աւելի տեւած դատավարական խեղկատակութեան արդիւնքում այսօր Պաքուի ռազմական դատարանը հրապարակեց Արցախի ռազմաքաղաքական նախկին ղեկավարների եւ միւս հայ բանտարկեալների դէմ շինծու մեղադրանքների գործով «դատավճիռները»:

Դռնփակ, կեղծ «դատավարութեամբ» կանխորոշուած վճիռներով Ազրպէյճանը աւելորդ անգամ հաստատեց, որ հակառակ խաղաղութեան մասին խօսոյթին եւ ձեւական քայլերին, Հայաստանի Հանրապետութեան գործող իշխանութիւնների մեղսակցութեամբ, շարունակում է իր հակահայ քաղաքականութիւնն ու վարքագիծը:

Ի սկզբանէ ակնյայտ էր, որ Պաքուի այս «դատավարութեան» նպատակն է թիրախաւորել ու վարկաբեկել Արցախի ու Հայաստանի Հանրապետութիւնները, արցախահայութեան ինքնորոշման պայքարը եւ այդ պայքարի առաջնորդներին:

Յատկանշական է, որ Հայաստանի ու հայերի դէմ կայացուած «դատավճիռների» նախօրէին Նիկոլ Փաշինեանն ու Իլհամ Ալիեւը Ապու Տապիում խաղաղութեան մրցանակ են ստանում: Ահա թէ ինչպիսի՛ն է եւ ինչի՛ մասին «խաղաղութեան գործընթացը»:

Պաքուի ռազմական դատարանի կողմից դատապարտուած գերեվարուած հայերը իրականում փաստացի պատանդներ են Ազրպէյճանի ձեռքում: Առանց այդ պատանդների անյապաղ եւ առանց նախապայմանի ազատ արձակման, Հայաստանի, Արցախի ու Ազրպէյճանի միջեւ խաղաղութեան հաստատման մասին խօսելը ծաղրանք է, անկախ նրանից, թէ ովքե՛ր են այդ խօսոյթի հեղինակները:

Մենք շարունակելու ենք մեր պայքարը` Ազրպէյճանում պահուող հայ բոլոր գերիների ազատ արձակումը ապահովելու համար: Կոչ ենք անում մեր տարածաշրջանում իսկական խաղաղութեան ջատագով ուժերին, առհասարակ մարդու իրաւունքների, ժողովրդավարութեան եւ արդարութեան համար աշխատող միջազգային բոլոր կառոյցներին` հետամուտ լինել եւ աջակցել հայ գերիների ազատ արձակման հարցում:

Արցախի, Հայաստանի եւ Ազրպէյճանի միջեւ իսկական խաղաղութեան մասին կարելի է խօսել միայն արցախցիների անհատական ու հաւաքական բոլոր իրաւունքները, ներառեալ պատանդների հայրենիք վերադարձը ապահովելու ճանապարհով:

Դա ենթադրում է բոլոր առումներով իսկապէս ուժեղ հայրենի պետութիւն եւ ազգային նպատակների շուրջ համազգային համախմբում: Հայ յեղափոխական դաշնակցութիւնը յանձնառու է եւ շարունակելու է այդ նպատակին միտուած կազմակերպուած ու նպատակասլաց պայքարը:

ՀՅԴ ԲԻՒՐՕ

5 փետրուար 2026