Իշխանեան. “Բանակցային սեղանին առաջարկներու որոշակի ծրար մը կայ, որուն շուրջ կ՛ընթանան բանակցութիւնները”
Ըստ Արցախի Հանրապետութեան Ազգային ժողովի “Դաշնակցութիւն” խմբակցութեան պատգամաւոր եւ Արցախի նախագահի թեկնածու Դաւիթ Իշխանեանի, ակնյայտ է, որ 29-30 յունուարին Ժընեւի մէջ տեղի ունեցած Հայաստանի եւ Ազրպէյճանի արտաքին գործոց նախարարներու հանդիպումին քննարկուած է Լեռնային Ղարաբաղի տագնապի խաղաղ լուծման հոլովոյթը:
Ան “Թերթ”-ին (լրագրող Հռիփսիմէ Յովհաննիսեան) հետ զրոյցի մը ընթացքին տարակուսանք յայտնեց, թէ յստակ չէ, թէ ի՛նչ սկզբունքներու հիման վրայ եղած են բանակցութիւնները. տեղեկատուութեան պակաս կայ:
“Ինքնին հանդիպման տեւողութիւնը, որ կարծես թէ նախադէպը չունեցող էր, կը յուշէ, որ արտաքին գործոց նախարարները բաւական լուրջ խնդիրներու վրայ պէտք է կեդրոնացած ըլլային”, ըսաւ ան:
Դաւիթ Իշխանեան նշեց, որ առիթներ ունեցած է արտայայտելու իր կարծիքը այն մասին, որ բանակցային սեղանին առաջարկներու որոշակի ծրար մը կայ, որուն շուրջ ալ կ՛ընթանան բանակցութիւնները: Հիմա ալ, ըստ անոր, այդ կարծիքին է:
“Չեմ կրնար մեկնաբանել, թէ ինչու Հայաստանի իշխանութիւնները ատիկա կը թաքցնեն: Կը կարծեմ` այն տեսակէտները, զորս Հայաստանի իշխանութիւնները կը ներկայացնեն, պէտք է իրենց գործնական քայլերը ունենան` նկատելով, որ ժընեւեան հանդիպումէն ետք ԵԱՀԿ-ի Մինսքի խմբակի համանախագահներուն տարածած յայտարարութեան մէջ գաղտնիութեան սկզբունքի եւ ժողովուրդները խաղաղութեան նախապատրաստելու մասին հատուածները կը յուշեն, որ հիմա բանակցութիւններուն մէջ խնդիրներ կան, իսկ թէ ի՛նչ խնդիրներ կան, կը դժուարանամ ըսել”, ըսաւ Արցախի ՀՅԴ կառոյցի ղեկավարը:
Դաւիթ Իշխանեան նշեց, որ իրենք չեն տեսներ Լեռնային Ղարաբաղի տագնապի լուծման հոլովոյթին վերաբերեալ Հայաստանի Հանրապետութեան իշխանութիւններու հայեցակարգը: “Այդ հայեցակարգը միայն յայտարարութիւններով եւ պարզապէս բանաւոր տեսակէտներով չ՛ըլլար: Այդ առումով դժուար կը դառնայ մեկնաբանելը: Եթէ մենք ունենանք իրենց յստակ համոզումը, մենք ալ անոր վերաբերեալ կ՛ունենանք մեր կարծիքը”, ըսաւ ան:
Անդրադառնալով Հայաստանի Հանրապետութեան իշխանութիւններու յայտարարութիւններուն, որ Արցախը պէտք է վերադարձնեն բանակցային սեղան, եւ այժմ նման բանի մը հաւանականութեան` Արցախի Հանրապետութեան նախագահի թեկնածուն նշեց, որ իրենք շատ լաւ կը հասկնան, որ միայն Հայաստանի ցանկութեամբ ատիկա կարելի չէ ընել:
“Այդ առումով Հայաստանի տուեալ առաջարկը պէտք է աւելի խորացուէր, եւ ըստ կարելւոյն քայլերու ձեռնարկուէին այն իրականացնելու ուղղութեամբ: Այստեղ համակարգուած աշխատանք պէտք է: Այսօր կը տեսնենք, որ Արցախը բանակցային սեղան վերադարձնելուն ի պատասխան` միւս կողմը իր քայլերուն ձեռնարկած է, այսպէս կոչուած` Լեռնային Ղարաբաղի մէջ ազրպէյճանական համայնքի առկայութեան փաստարկը մէջտեղ բերելով”, ըսաւ ան:
Անդրադառնալով ժընեւեան հանդիպումէն ետք տարածուած յայտարարութեան մէջ օգտագործուող “Արցախի ժողովուրդի ընտրեալ ներկայացուցիչներ” արտայայտութեան` Դաւիթ Իշխանեան նշեց, որ ձեւակերպման այդպէս օգտագործումը բխած է հանդիպումի ընթացքին եղած քննարկումներէն եւ քննարկուող սկզբունքներէն:
“Հաւանաբար, մենք յայտարարութեան մէջ կը տեսնենք քննարկուող սկզբունքներու արտացոլումը: Այդ ձեւակերպումը պատահական չի կրնար ըլլալ, ինչպէս պատահական չի կրնար ըլլալ ազրպէյճանական մամուլին մէջ ի յայտ եկած, այսպէս կոչուած, Լեռնային Ղարաբաղի մէջ ազրպէյճանական համայնքին հետ Ազրպէյճանի մէջ Միացեալ Նահանգներու դեսպանի հանդիպման մասին լուրը”, ըսաւ ան:
Դիտարկման, թէ ի՞նչ տպաւորութիւն կը ստանայ Լեռնային Ղարաբաղի տագնապի խաղաղ լուծման հոլովոյթին մէջ Հայաստանի Հանրապետութեան իշխանութիւններու վարած քաղաքականութենէն, արդեօք բաւական թափանցի՞կ են, ինչպէս բազմիցս կրկնած է վարչապետ Նիկոլ Փաշինեան` Դաւիթ Իշխանեան պատասխանեց.
“Թափանցիկութիւնը կ՛ենթադրէ հաշուետուողականութիւն. նման որոշ սկզբունքներ երբեմն կ՛արտացոլան Հայաստանի խորհրդարանի բարձր ամպիոնէն կամ այլ ձեւաչափով: Բայց, այնուհանդերձ, կը կարծեմ, որ այդ թափանցիկութեան եւ հաշուետուողականութեան մակարդակը տակաւին բաւարար չէ”, ըսաւ ան: