Մաքրոն. «Ալիեւի հետ պիտի քննարկեմ հայ գերիներու հարցը»
Ֆրանսայի նախագահ Էմանուել Մաքրոն Երեւանի մէջ յայտարարած է, որ Պաքուի մէջ պահուող հայ պատերազմական գերիներու եւ պատանդներու վերադարձի հարցը պիտի քննարկէ Ազրպէյճանի նախագահ Իլհամ Ալիեւի հետ:
«Այս այցելութենէն ետք կրկին քննարկում պիտի կատարեմ նախագահ Ալիեւի հետ. դուք գիտէք, որ մենք միշտ կը փորձենք միջնորդի մեր դերը խաղալ եւ օգնել», ըսած է Մաքրոն` պատասխանելով «Նիուզ»-ի լրագրողի հարցումին:
Ան յատկապէս կարեւոր նկատած է շրջանին մէջ կայունութեան ապահովումը:
«Ուրախ եմ, որ վերջին ամիսներուն լարուածութիւնը նուազած է: Նոր փուլ սկսած է, որ պիտի ուղեկցուի խաղաղութեամբ եւ կայունութեամբ», եզրափակած է Ֆրանսայի նախագահը:
Մաքրոն Հայաստան հասաւ 3 մայիսին` Եւրոպական քաղաքական համայնքի 8-րդ վեհաժողովին մասնակցելու համար: