ՀՅԴ Հայաստանի Գերագոյն Մարմինի Յայտարարութիւն

Հայաստանն Արցախին կապող երթուղու փոփոխութեամբ պայմանաւորուած, վերջին օրերին, ազրպէյճանական զինուած ուժերը Տեղ գիւղի ուղղութեամբ անարգել մուտք են գործել Հայաստանի Հանրապետութեան ինքնիշխան տարածք եւ գրաւել կարեւոր ռազմավարական գերիշխող դիրքեր: Այս ամէնը` Հայաստանի Հանրապետութեան ներկայ իշխանութեան անգործութեան կամ էլ լուռ ու գաղտնի համաձայնութեան հետեւանք է:

Հայաստանի Հանրապետութեան վարչապետի պաշտօնը զբաղեցնող անձը նախ յայտարարեց, թէ վերադիրքաւորումները կապուած են ազրպէյճանական կողմի հետ նախկինում ձեռք բերուած պայմանաւորուածութիւնների համաձայն Լաչինի միջանցքին կապող երթուղին ապրիլի 1-ից Կոռնիձորով անցնելու հետ եւ հայկական դիրքերի որեւէ փոփոխութիւն տեղի չի ունեցել:

Սակայն հանրային ահազանգից յետոյ, Հայաստանի Հանրապետութեան Ազգային անվտանգութեան ծառայութիւնը ստիպուած «պարզաբանում» տարածեց, ըստ էութեան, ընդունելով, որ որեւէ տեղ չարձանագրուած նախկինում եղած պայմանաւորուածութիւնները խախտելով ազրպէյճանական կողմը 5 ուղղութիւններով սահմանից 100-ից 300 մեթր աւելի առաջ է տեղակայուել:

Առկայ փաստերը, Հայաստանի Ազգային ժողովի «Հայաստան» խմբակցութեան պատգամաւորների Սիւնիք կատարած այցի եւ տեղում առանձին հանդիպումների արդիւնքում ստացուած տուեալները ստիպում են արձանագրել, որ.

1.- 2020 թուականի նոյեմբերի 9-ից յետոյ, Ազրպէյճանը իրարայաջորդ յարձակումներով ու առաջխաղացումներով, գրաւած պահելով Հայաստանի Հանրապետութեան ինքնիշխան տարածքների հսկայական հատուածներ, աշխուժ կերպով շարունակում է ամրակայման աշխատանքների իրականացումը, ինչի հետեւանքով տեղի է ունենում փաստացի սողացող բռնագրաւում:

2.- Նման յարձակողապաշտութեան ի պատասխան, Հայաստանի Հանրապետութեան իշխանութիւնները յղում անելով ինչ որ բանաւոր պայմանաւորուածութիւնների, ինքնակամ զիջում են Հայաստանի Հանրապետութեան ինքնիշխան տարածքներ` ստեղծելով լրջագոյն անվտանգային սպառնալիքներ:

3.- Մինչեւ հիմա պարզաբանուած չէ, թէ ի՞նչ պայմանաւորուածութիւններ են նախկինում ձեռք բերուել, ի՞նչ փաստաթղթով են դրանք ամրագրուել, ինչի՞ հիման վրայ են Հայաստանի Հանրապետութեան սահմանի առանձին հատուածները համարւում Ազրպէյճանի հետ արդէն ճշգրտուած:

4.- Թշնամին, փաստօրէն կամայականօրէն կատարում է սահմանազատում ու սահմանագծում` ըստ իր ցանկութեան, ինչը վտանգաւոր նախադրեալներ է ստեղծում գալիք որեւէ բանակցութիւնների համար:

Անընդունելի եւ դատապարտելի է այն փաստը, որ թշնամու սանձարձակ ու անարգել գործողութիւններին հակազդելու փոխարէն, Հայաստանի Հանրապետութեան իշխանութիւնը շարունակում է անգործութիւն դրսեւորել եւ հանրութեանը կերակրել անատամ եւ մոլորեցնող յայտարարութիւններով:

ՀՅԴ Հայաստանի Գերագոյն մարմինը մէկ անգամ եւս հաստատում է, որ Հայաստանի Հանրապետութեան իշխանութիւնը, վաղուց հրաժարուել է մեր երկրի անվտանգութեան նկատմամբ իր առաջնային պարտաւորութիւնից եւ խաղաղութեան կեղծ օրակարգով երկիրը տանում է նոր պատերազմի եւ զիջումների:

Այս պայմաններում, անհրաժեշտ ենք համարում Հայաստանի Հանրապետութեան պետական եւ ազգային շահերով առաջնորդուող բոլոր առողջ ուժերի եւ հանրութեան համախմբման անհրաժեշտութիւնը, թոյլ չտալու համար, որ թշնամու կամակատար այս իշխանութիւնը շարունակի իր ազգակործան ընթացքը:

ՀՅԴ ՀԱՅԱՍՏԱՆԻ ԳԵՐԱԳՈՅՆ ՄԱՐՄԻՆ

3 ապրիլ 2023